AISHI MANULA ATUA RASMI MSIMBAZI ASAINI KANDARASI NONO

Klabu ya wekundu wa msimbazi , Simba imefanikiwa kunasa saini ya kipa bora wa ligi kuu Tanzania bara msimu wa 2016/2017 aliyekua akiichezea Azam FC, Aishi Manula .

Aishi Manula ambaye amejifunga kwa miaka miwili Simba , anamfuata aliyekua nahodha wake , John Bocco ambaye tayari ameshatia saini kuwatumikia wekundu wa msimbazi kwa msimu ujao .

Taarifa za ndani kutoka klabu ya Azam FC zinasema kuwa klabu hiyo kwasasa ina mpango wa kubana matumizi huku ikigoma   kutoa pesa za kuwasajili  wachezaji wake  wanaomaliza mikataba. Ukiachana na Bocco na Manula , huenda  Azam FC ikawapoteza nyota wake muhimu zaidi ya saba .

Simba imempata Manula wakati ambao anashikilia rekodi ya kuwa kipa pekee aliyeweza kushinda tuzo ya Kipa Bora wa Ligi Kuu Bara na kisha kuitetea. Kipa huyo aliyeibuliwa na Azam amekubali mkataba wa Sh50 milioni kujiunga na Simba na kuitosa Singida United iliyokuwa imempatia ofa ya Sh60 milioni.

Sababu kubwa za Manula kuacha fedha ndefu ya Singida na kutua Simba imetajwa kuwa ni timu hiyo kushiriki mashindano ya kimataifa mwakani pamoja na mapenzi yake ya kuendelea kusalia jijini Dar es Salaam kufanya shughuli zake nyingine. Simba itacheza Kombe la Shirikisho.

Manula amekuwa katika kiwango cha juu katika kipindi cha miaka minne sasa ambapo mbali na kushinda tuzo ya Kipa Bora wa Ligi Kuu mara mbili (2016 na 2017), alikuwa kipa namba mbili Kombe la Kagame mwaka 2015.